साेमबार
नेपालले टस जितेर ब्याटिङ गर्दै १८.५ ओभरमा ८ विकेट गुमाएर १२२ रन बनाएको अवस्थामा वर्षा सुरु भएको थियो। पहिलो इनिङ्स सकिन मात्र ७ बल बाँकी रहँदा खेल रोकिएपछि नेपालले पुनः ब्याटिङ गर्न पाएन र युएईको इनिङ्सलाई १० ओभरमा छोट्याइएको छ।
नेपालका लागि कप्तान दीपेन्द्रसिंह ऐरीले ३२ रनको महत्त्वपूर्ण अविजित इनिङ्स खेले। यस्तै, बसिर अहमदले २०, कुशल मल्लले १७ र कुशल भुर्तेलले १६ रनको योगदान दिए।
अन्य ब्याट्सम्यानहरूमा अर्जुन साउद र नन्दन यादवले समान १३–१३ रन बनाए भने सन्दीप जोराले ६ र गुल्शन झाले १ रन जोडे। सन्दीप लामिछाने २ रनमा नटआउट रहँदा शेर मल्ल शून्य रनमै पभेलियन फर्किएका थिए।
युएईका बलर मोहमद जुहैबले घातक बलिङ गर्दै ३ विकेट लिए। यस्तै, जुनैद सिद्दिकीले २ विकेट लिँदा हैदर अली र मुहमद अर्फानले समान १–१ विकेट हात पारे।
नेपाल र युएईबीच जारी दुई खेलको शृंखला अन्तर्गतको दोस्रो तथा अन्तिम खेल भोलि मंगलबार सोही मैदानमा हुनेछ।
